ഹെല്‍ത്ത് പ്രൊഡക്ടിന്റെ പേരില്‍ ഇരട്ടി ലാഭം വാഗ്ദാനം നല്‍കി കാസര്‍കോട് സ്വദേശിയില്‍ നിന്ന് 43 ലക്ഷം രൂപ തട്ടിയെടുത്ത കേസില്‍ ഒരാള്‍ അറസ്റ്റില്‍
കാസര്‍കോട്: ഹെല്‍ത്ത് പ്രൊഡക്ടിന്റെ പേരില്‍ ഇരട്ടി ലാഭം വാഗ്ദാനം നല്‍കി കാസര്‍കോട് സ്വദേശിയായ റിട്ട.ബാങ്ക് ഉദ്യോഗസ്ഥനില്‍ നിന്ന് 43 ലക്ഷം രൂപ തട്ടിയെടുത്ത സംഭവത്തില്‍ വിദേശ പൗരനെ ബംഗളൂരുവില്‍ വെച്ച് അറസ്റ്റ് ചെയ്തു.
നെതര്‍ലാന്റ് സ്വദേശി ആന്റണി ഒഗനറബോയെയാണ് പിടികൂടിയത്. കാസര്‍കോട് സി.ഐ പി. അജിത് കുമാറിന്റെ നേതൃത്വത്തില്‍ ബംഗളൂരുവില്‍ നിന്ന് പിടികൂടിയ പ്രതിയെ കാസര്‍കോട് കൊണ്ടുവന്ന് അറസ്റ്റ് രേഖപ്പെടുത്തി. പ്രതിയുടെ പക്കല്‍ നിന്നും ലാപ്‌ടോപ് എക്‌സ്റ്റെണല്‍ ഹാര്‍ഡ് ഡിസ്‌ക്, പെന്‍ഡ്രൈവ്, 4 മൊബൈല്‍ ഫോണ്‍, വിവിധ ബാങ്കുകളുടെ 7 എടിഎം കാര്‍ഡുകള്‍, വിവിധ ആള്‍ക്കാരുടെ പേരിലുള്ള 3 പാസ്‌പോട്ടുകള്‍, ഡോളറിന്റെ ഫോട്ടോകോപ്പികള്‍, ആധാര്‍ കാര്‍ഡ്, പാന്‍കാര്‍ഡ്, ഡ്രൈവിങ് ലൈസന്‍സ്, പാസ്‌പോര്‍ട്ടിന്റെ പകര്‍പ്പ് എന്നിങ്ങനെ വിലപിടിപ്പുള്ള വിവിധ വസ്തുക്കളും ലഭിച്ചിട്ടുണ്ട്.
കാസര്‍കോട് ഗ്രാമീണ്‍ ബാങ്ക് റിട്ട. ഉദ്യോഗസ്ഥന്‍ വിദ്യാനഗര്‍ ജേര്‍ണലിസ്റ്റ് കോളനിയിലെ കെ.മാധവന്റെ പരാതിയിലാണ് കേസെടുത്തത്. സംഭവത്തില്‍ നെതര്‍ലാന്റ്, ഇംഗ്ലണ്ട് സ്വദേശികളടക്കം 5 പേര്‍ക്കെതിരെ കാസര്‍കോട് പൊലീസ് കേസെടുത്തിരുന്നു.
